Um Holtið

Alexander er nýr starfsmaður í Holtinu. Alexander er í 33% starfi og vinnur með unglingum á kvöldin og miðstigi á fimmtudögum.

Alexander er fæddur og uppalin á Stokkseyri og er mikill íþróttaálfur í eðli sínu. Alexander stundar nám í Íþróttafræði við Háskóla Íslands og kemur í vinnuna stútfullur af hugmyndum og skemmtilegum hlutum í tengslum við hreyfingu og íþróttir. Alexander er einnig einstaklega öflugur tölvuleikjaspilari og vinnur með rafíþróttaklúbb Holtsins, MysterII.

Harpa Rós er nýr starfsmaður hjá Holtinu. Harpa Rós er í 55% starfshlutfalli hjá Holtinu og vinnur með miðstigi á daginn og unglingum á kvöldin. Harpa er Breiðhyltingur í húð og hár og uppáhalds maturinn hennar er rjómapasta.  Þegar Harpa er ekki í vinnunni stundar hún nám í Tómstunda- og félagsmálafræði við HÍ.

Kristín Björg er nýr starfsmaður hjá Holtinu. Kristín Björg, eða Krilla eins og hún er oft kölluð, er í 42% starfshlutfalli hjá Holtinu og vinnur með 10-12 ára á daginn og unglingum á kvöldin. Krilla kemur frá Grafarholtinu og elskar útiveru, ferðalög og tortillur (eða torkrillur eins og hún kallar það).

Krilla stundar einnig kennaranám við HÍ samhliða vinnu.

Jóhannes Ágúst er nýr starfsmaður í Holtinu. Jóhannes Ágúst er í 33% starfi og vinnur með unglingum á kvöldin ásamt því að sjá um tónlistarklúbb Holtsins og upptökuver.

Jóhannes Ágúst kemur frá Eyrinni á Akureyri og elskar ekkert meira en nammibarinn í Hagkaup og Greifann. Jóhannes Ágúst er menntaður tónlistarmaður og ver hann mest öllum sínum tíma í studio-Holtsins að þjálfa unga og upprennandi tónlistarmenn Norðlingaholtsins.

Sölvi er í 100% starfi. Sölvi hefur unnið í félagsmiðstöðvastarfi í Reykjavík og á Akureyri frá árinu 2013. Sölvi vinnur með 10-12 ára krökkum, sér um Strákaklúbbinn Snáða og UngRúv klúbb Holtsins ásamt því að vinna með unglingum á kvöldin.

Sölvi kemur frá brekkunni á Akureyri og er af mörgum talinn vera síðasti vinur landsbyggðarinnar.

Þórhildur hóf störf haustið í Holtinu árið 2018. Hún er í 33% starfi og stundar einnig nám í Íþróttafræði við HÍ. Þórhildur vinnur með 10-12 ára ásamt því að sjá um stelpuklúb Holtsins og vinna með unglingum á kvöldin.
Þórhildur, eða Tóta eins og hún er gjarnan kölluð, er mikill íþróttaálfur og spilar handbolta með Fylki. Það vita það ekki margir, en Tóta á einnig óstaðfest Íslandsmet í Pad Thai kappáti.

Ólöf hóf störf haustið 2017. Hún er í 33% starfi. Ólöf er með stelpuklúbb Holtsins og vinnur með unglingum á kvöldin.

Ólöf stundar kennaranám við HÍ samhliða vinnu. Ólöf er einstaklega lunkin við bakstur og snjóbretti en aldrei á sama tíma. Ólöf er harður stuðningsmaður Manchester United og Magna á Grenivík.

Sandra Dís byrjaði haustið 2015. Sandra er í 100%  vinnu sem forstöðukona. Sandra vinnur með 10-12 ára og unglingum ásamt því að sjá um Rafíþróttalið (E-sports) Holtsins.

Sandra Dís er ofurmamma frá Blönduósi og síðasti lifandi erfingi Vilko Vöfflu-veldisins. Sandra er reynslubolti í félagsmiðstöðvastarfi og finnst henni skemmtilegast að ferðast, samvera með vinum og horfa á sjónvarpsþættina Peppa Pig.